WILLEMSTAD – No mas ku ayera outoridatnan polisial a atvertí pa esnan ku ta bende vürwèrk oumentá seguridat na e establesimentu nan. Esaki ta lokual doñonan di Kenlis Fireworks situá den área di Sentro Deportivo Kòrsou a hasi, poniendo un bewaker na e sitio. Lamentablemente e kriminalnan a bin ku otro intenshon awe den oranan di mardugá alrededor di 4:40 am. Apesar ku tabatin bewaker nan a atraká e hòmber ku tabata kumpliendo ku su trabou. Nan a logra di bai ku su outo, Kia Rio pero no a logra kibra e kònteiner di vürwèrk ya ku el a logra yama pidi asistensia i otro bewakernan a kore yega. Polis tambe a akudí na e sitio pa kuminsá ku nan investigashon. Nan a bin topa e outo di e bewaker na altura di e rotònde di Brievengat. Pa un motibu òf otro e atrakadornan a disidí baha na katuna na pia lagando e outo einan. E investigashon ta kontinuá.
