NEW YORK, AP.- ABC a kanselá su relansamentu eksitoso di “Roseanne” djamars despues ku su estrea, Roseanne Barr, a tweet ku e asesor antiguo di Barack Obama, Valerie Jarrett tabata un produkto di Hermandat Musulman i “Planet of the Apes”.
E presidente di ABC Entertainment, Channing Dungey, a bisa ku e komentario ta “repugnante i no ta representá nos balornan”. Barr a diskulpá i a deshasí di e tweet djaluna anochi, kual el a kalifiká komo un “mal chiste”, pero e daño ya a wòrdu hasí.
E aktris a wòrdu bandoná pa su agensia di talento, ICM Partners.
“Roseanne” tabata un éksito inesperá pa ABC, propiedat di Walt Disney Co., i e kadena a plania pa kontinuá ku un serie lukrativo pa e próksimo temporada.
E promé episodio den mart a wòrdu mirá pa mas di 25 mion persona, un sifra inusual pa un kadena habrí di televishon. ABC a spera ku anunsiantenan ta paga miónes di dòler pa e oportunidat di wòrdu mirá durante ‘break’ nan komersial di e komedia mas popular di TV desde “The Big Bang Theory”.
Tur kos a wòrdu kanselá danki na e tweet di 53 palabra.