BALTIMORE, AP.- Union Amerikano di Libertat Sivil (ACLU) a presentá un demanda kontra e òrdu di presidente Donald Trump di prohibí personanan transgenero di uni ehérsito.
E demanda federal Stone Vs. Trump a wòrdu presentá na Maryland na nòmber di Brock Stone, kende tin 11 aña den Ehérsito i tabata den Afganistan. E keho tambe ta un sosten na otro transgeneronan tambe ku ta forma parti di Forsa Aéreo i Marina.
Djabièrnè Trump a ordená Pentágono pa implementá e prohibishon, kual a wòrdu anunsiá riba Twitter promé. Ademas, esaki a duna Departamento di defensa outoridat pa disidí futuro di personanan abiertamente transgenero i ku ya ta den servisio kaba.
E demanda ta bisa ku e polítika presidensial ta violá protekshon di igualdat pa miembronan di servisio transgenero, kende awor tin “motibunan serio pa teme pa nan karera”.
Ademas, e demanda ta kuestioná loke Trump a bisa pa hustifiká e medida. Den tweetnan a presidente a skibi ku el a tuma e desishon despues di konsulta “ku mi ekspertonan general i militar” kende ta bisa ku “nan no por tin karga di kostonan médiko haltu i loke transgeneronan den ehérsito lo representá”.
