WILLEMSTAD.- Miembronan di e koperativanan di agrikultura, krio di bestia i peska djaluna awor lo duna nan aprobashon final na e dokumento ku tur e puntonan di doló di e koperativanan i tambe sugerensianan kon pa remediá problemanan ku e sektor primario ta keha di dje pa hopi aña kaba. Union di koperativanan di agrikultura, krio di bestia i peska (A.K.P.) ta spera tur miembro presente na sede di partido Nashonal pa 7’or di anochi.
E dokumento final ku ta kontené posishon di koperativanan di tur e tres arianan di sektor primario na Kòrsou ta kla for di siman pasá. Djaluna último a pasa den e dokumento pa kaba di drecha e formulashon i djaluna awor pues miembronan mester ratifiká esaki pa seguidamente presentá e dokumento final na gobièrnu.
E sektor primario ke reunion ku gobièrnu pa asina tur minister konserní ta presente i huntu atendé ku e kambionan ku e sektor ke mira tuma lugá. Di e forma aki ta spera ku gobièrnu ta bai atendé di forma integral pa porfin duna un empuhe na mas produkshon lokal di produktonan pa alimentashon.
Ta parlamentario pa PNP, Elvin Gerard a trese e koperativanan den sektor primario huntu pa traha un moketa i eksigí mas atenshon pa e sektor. A usa sede di PNP pa tene e reunionnan.
Tabata durante di un reunion ku koperativa Kria Tur (kriadónan di bestia) ku a bai di akuerdo ku un proposishon pa invitá mas koperativa ku ta representá tambe kunukeronan i piskadónan pa asina yega na puntonan di interes komun ku e meta pa mehorá e sektor kompletu.
Tin hopi tempu kaba ku e sektor di krio di bestia, peska i agrikultura ta manda karta pa gobièrnu i otro instansianan pa buska solushon pa e situashon penoso ku e sektor ta eksperensiá. Tur gobièrnu di turno a primintí ku nan lo atendé i sostené kriadónan di bestia, sektor di agrikultura i peska, pero nada no ta sosodé.
Puntonan di por ehèmpel kriadónan di bestia ke mihó kontròl i regulashon ku di dje ta ladronisia di bestia, kompra i benta di karni klandestino, palabrashonnan riba dianan i orario ku ta sakrifisio di bestia, mihó aksesibilidat na marshe di barber, preis di kuminda pa bestia mas faborabel i plan nobo di higiena kon ta atendé ku karni.
Lider polítiko di partido MAN-PIN, Giselle Mc William ta boga pa krea un fondo pa agrikultura, krio di bestia i peska. E ta mustra ku na Aruba i Boneiru a hasi esaki via e organisashon Qredits i ta urgi gobièrnu di MFK i PNP pa hasi e mesun kos na Kòrsou.
Tambe MAN-PIN ta sinti falta di vishon i maneho di unda Kòrsou ke bai ku su sektor primario. Den e kuadro aki e partido ta urgi e minister konserní pa formulá i publiká su vishon pa e sektor inkluso su maneho kon pa realisá e vishon aki.
