NEW YORK/WILLEMSTAD.-E kantidat di migrantenan ku ta yega siudat di New York ta motibu di preokupashon grandi. Alkalde di New York Eric Adams a disidí na tuma èkstra media pa loke ta trata atmishon di imigrante den shelternan. Spesialmente pa loke ta trata imigrantenan mayor di edat a pone ku nan no por keda mas ku 30 dia den un shelter operá pa gobièrnu. Un di e motibunan prinsipal ta pa konvensé imigrantenan pa stòp di bai New York. Kòrsou tambe ta konfrontando problema serio ku kantidat di boto ku ta yega ku venesolanonan indokumentá. Merka tin areglo di asilo, pero Kòrsou no. Gobièrnu lokal tambe ta den lucha kontinuo pa wak kon ta logra kontrolá e situashon mirando ku ai no tin e kapasidat ni finansa pa atendé ku e nesesidat di e imigrantenan ei.
Alkalde Adams a anunsiá e medidanan mas severo despues ku e atministrashon Biden a bisa siman pasá ku lo por duna status di protekshon temporal na algun shen mil imigrante di Venezuela ku a yega Merka prome ku 31 di yüli último. E desishon ei lo fasilitá e proseso pa e imigrantenan enkuestion di haña outorisashon pa traha legal na Merka.
E supuesto abogadonan di imigrantenan mesora a lansa krítika riba e medidanan severo di e alkalde bisando ku e medidanan no ta nesesario i ku ta algu inhumano. Pero no ta alkalde di New York so ta konfrontando problema serio ku gran kantidat di migrante ku ta yega e pais. Shelternan tur kaminda ta yen i ketu bai mas imigrante ta sigui yega. New York so tin mas ku 60,000 imigrante ku ta pidi asilo. E abogadonan pa imigrante ta kontentu ku e idea di Biden pa duna protekshon temporal na venesolanonan pasobra di e forma ei e kantidat enorme di venesolanonan ilegal na New York lo por traha legalmente. Den asosiashon di empresarionan tin esnan ku ta aploudí e idea pa nan haña trahadó miéntras otronan tin miedu ku e desishon di atministrashon Biden al final lo empeorá e problema di imigrantenan na New York.
For di lente aña pasa te awor aki un kantidat di 116.000 migrante a drenta Merka for di e frontera ku Mexico. Na yüli di e aña aki Adams a permití pa migrantenan keda te un máksimo di 60 dia den shelternan operá pa gobièrnu pero esei solamente a pone ku mas hende a keda den shelter i e kantidatnan ta sigui krese. Mientrastantu e abogadonan pa migrante ta pidi pa gobernashon pone fondo disponibel pa yuda e imigrantenan haña lugá pa biba i estadia permanente.
