WILLEMSTAD.- Alumnonan di grupo 7 di M.M. Römerschool djaluna ultimo a bishitá ofisina di EXTRA. E muchanan a bin na studio di EXTRA huntu ku Jandino Asporaat, coach Arlene Falbru i direktor di M.M. Römerschool Juanita Hollander. E muchanan, den kuadro di e proyekto ‘Entrepeneurship i Leadership’ e dia ei a duna diferente entrevista. Ta trata di Zarah Monte, Khyla Rumai, Bre’djean Bouthisma, Kian Hinkel i Braydon Snijders.
Djaluna ultimo nan a bishitá EXTRA, pero tambe a bishita TeleCuraçao, RockKorsou i Dolfijn FM. Nan a duna diferente entrevista tokante un proyekto di ‘djèm di mango’. Den e proyekto nan a hasi negoshi ku un produkto ku nan mes a traha. Den e studio di EXTRA e muchanan a papia tokante e proyekto. Segun Jandino Asporaat nan trabou por konta komo ehèmpel pa otro alumnonan.
Despues di entrevista e alumnonan a haña un rekorido den ofisina di EXTRA, ku ta e korant mas grandi na Kòrsou. Nan a bishitá studio di departamentu digital, tambe a wak parti atministrativo, departamento di aviso i redakshon di e korant. Tambe e alumnonan a haña un rekorido den drukkerij De Stad na unda kasi tur korant di Kòrsou ta keda imprimí.
E alumnonan a bin ku diferente pregunta i a disfrutá e rekorido. Tambe Jandino Asporaat tabata presente durante e rekorido. E artista tambe tabatin diferente pregunta tokante e mundu interesante di korant i medio di komunikashon.
