MAR DEL PLATA, ARGENTINA, AP.- Ekspertonan ta analisá zonidonan ku posiblemente a bini di un supmarino argentino ku a pèrdè sinku dia pasa ku 44 tripulante na bordo, segun informashon di Armada den e pais djaluna.
Un avion Poseidon P-8 di Marina merikano a wòrdu manda e área kaminda barkunan di Armada argentino a skucha zonidonan pa verifiká su fuente, segun Enrique Balbi, bosero di forsa.
E zonidonan a wòrdu kaptá den Sur Atlántiko na 360 kilometer di kosta di Argentina i un profundidat di 200 meter.
Un funshonario di Armada merikano na altura di e búskeda a atvertí ku no ta evidente si e argentinonan a deskribí e zonidonan komo algu similar na hèrmèntnan ku tabata wòrdu gòlpia kontra e supmarino, manera a wòrdu reportá anteriormente. E fuente a papia ku kondishon pa keda anónimo debí na e informashon di e zonidonan a bini di e gobièrnu argentino.
E supmarino ARA San Juan a pèrdè djárason miéntras e tabata Sali di e haf na sùit di Ushuaia pa e siudat na kosta di Mar del Plata. Mas di un desena di barku i avion internashonal ta partisipando den e búskeda, ku a wòrdu opstakulisá pa mal tempu ku a generá olanan di seis meter di altura.
Den e promé konfirmashon ku tabatin problema tékniko, un ofisial di Armada argentino a bisa algun ora promé ku e supmarino a reportá fayonan den bateria djárason i tabata regresando e base na momentu ku el a disparsé.
