WILLEMSTAD.- Polis ta publiká kantidat di artíkulo ku ta den nan poseshon i ku ta prosedente di ladronisia. Hopi ta artíkulonan manera peña, skeiru, artíkulonan pa apliká makiahe, tasnan di makiahe, ‘Lashes’, diferente telefòn selular, hèrmèntnan di trabou, kabel i hopi mas. En konekshon ku diferente kiebro na Banda Bou, personal di e tim di reshèrshi di Barber a tene un entrada hudisial riba un tereno den e área di Banda Bou.
Durante di e entrada hudisial aki a haña i konfiská diferente artíkulo prosedente di ladronisia.
Polis ta hasi un petishon na e personanan òf kompanianan ku por rekonosé un òf mas di e artíkulonan aki komo nan pertenensia, pa pasa na Warda di Polis na Barber djabièrnè 23 di febrüari 2024 entre 09.00’or i 12.00’or.
E petishon ta pa presentá ku sédula i komprobante di pago, kopia di denunsia òf potrèt di e artíkulo.
