BRASILIA, BRASIL, AFP.- Asesor di Lula da Silva a reuní ku presidente ruso Vladimir Putin na Moscow, kaminda nan a papia riba e posibilidat pa kuminsá ku un negosiashon di pas ku Ukrania, algu promé ku un bishita di e kansier ruso na Brasil riba 17di aprel, segun indikashon di un fuente di presidensia brasileño na AFP.
Celso Amorim, e asesor di presidensia di Brasil, a reuní ku Putin djaweps na Kremlin, den un enkuentro ku a dura un ora i ku a keda un sekreto.
E biahe di e asesor prinsipal di Lula pa asuntunan internashonal a sosodé ménos ku dos siman promé ku e bishitá China, un pais mas ku tambe ta promové un proposishon di pas pa e guera entre Rusia i Ukrania.
Lula a proponé pa krea un grupo di paisnan mediadó den e guera di Ukrania. E lo papia tokante e asuntu aki ku e presidente chines Xi Jinping riba 13 di aprel na Beijing.
