WASHINGTON, AP.- E asesor nobo di komunikashon di presidente Donald Trump, Anthony Scaramucci, a konsiderá ku ta momentu pa primi e “boton di start”.
E hòmber a anunsiá durante un entrevista ku programa Fox News Sunday ku esaki lo kuminsá “un era di bon sanshon” i a bai ku ta spera di “krea un ambiente mas positivo”.
Scaramucci a komprometé pa evitá filtrashon di informashon i focus riba mehorashon di mensahenan di Kas Blanku.
Trump a anunsiá djabièrnè ku Scaramucci, graduado di skol di lei di Harvard, lo tuma su kargo komo direktor di komunikashon di presidensia. E designashon ta tuma lugá na momentu ku e hefe di Kas Blanku ta konfrontando un kaida den su nivelnan di aprobashon, segun enkuestanan i bataya pa impulsá su agènda legislativo.
Trump a manifestá su frustrashon pa e atenshon na investigashonnan di vínkulo di Rusia ku su kampaña elektoral.
Sean Spicer, kende tabata fungi komo sekretario di prensa di Kas Blanku desde ku e atministrashon a kuminsá na yanüari, a renunsia abruptamente djabièrnè pa su desakuerdo ku e nombramentu di Scaramucci i lo wòrdu remplasá pa Sarah Huckabee Sanders, kende ta supsekretario di prensa.
