MOSKU, AP.- Un avion ku 73 pasahero na bordo a pega kandela ayera na momentu ku e tabata hasiendo un aterisahe di emergensia na airopuerto Sheremetyevo na Mòsku, lagando 41 morto asina un bosero di e komishon investigadó di Rusia a bisa.
E Sujoi SSJ100 operá pa e kompania di aviashon nashonal Aeroflot tambe tabata karga 5 tripulante ora el a toka tera i a kore riba e pista tur na kandela. Algun video a mustra e pasaheronan desesperá tabata bula for di e avion via di un trapi di chup i despues a kore riba e pista, algun ku nan ekipahe.
Dos di e víktimanan mortal tabata mucha asina e komité a bisa. Por lo ménos 6 persona a resultá heridá. E avion ku a sali for di airopuerto pa Sheremetyevo pa bai e siudat di Murmansk na nort di e pais a regresá e airopuerto pa motibunan tékniko no spesifiká ainda i a hasi un aterisahe fòrsá pa despues e pega na kandela, asina un komunikado di e airopuerto a indiká.
E avion a dal diferente biaha riba tera na momentu ku el a baha, segun un reportahe di avion medio di komunikashon.
“E investigadónan pronto lo kuminsá interogá víktimanan, e testigunan, e personal di airopuerto i tambe di e kompania di aviashon, meskos ku otro personanan responsabel di e operashon di e avion”, asina Svetlana Petrenko, bosero di e komishon a indiká.
