JACKSON, MERKA, AFP.- Gruponan di reskate a reskatá personanan di porta pa porta na Kentucky, den kondishonnan di klima kada biaha mas pió, miéntras esfuersonan di búskeda di víktimanan di inundashonnan severo ta kontinuá. E inundashonnan a afektá e estado na sùit di Merka, segun e gobernador djadumingu.
Algun área den e region ainda ta inaksesibel despues ku e inundashonnan a kombertí mayoria karetera den riu, kibra brùgnan i destruí kasnan i mata por lo ménos 26 persona, segun datonan ofisial.
“Esaki ta un di e inundashonnan di mas pió i mortal ku nos a mira den nos historia. I na momentu ku nos purba koba entre restunan, awa tambe ta kai”, segun indikashon di gobernador Andy Beshear na e programa “Meet the Press” di e kadena di NBC.
“Nos lo pasa di porta pa porta, i traha pa haña mas tantu persona posibel. Nos lo sigui traha den áwaseru tambe. Pero e kondishonnan di klima ta sigui kompliká kosnan”, segun indikashon di Beshear.
