TOKYO, HAPON, AFP.- Presidente di Merka, Joe Biden a yega Hapon djadumingu, kual ta e di dos i último etapa di su promé gira komo gobernante dor di Asia.
Despues ku el a bishita Surkorea, un gran aliado di Merka den Asia, Biden a yega Base Aéreo di Yokota, na wèst di Tokyo. E presidente merikano lo reuní ku e promé minister Fumio Kishida djaluna, i tambe emperador Naruhito. E lo partisipá den un kumbre ku ta inkluí gobernantenan di Oustralia, India, Hapon i Merka mañan.
Ademas, e lo presentá un inisiativa di komersio regional, Marko Ekonómiko pa Prosperidat den Indo Pasífiko.
Biden a probechá di e momentu pa felisitá Anthony Albanese, e ganadó di elekshonnan legislativo ku a tuma lugá un dia promé na Oustralia i a reafirmá e kompromiso inkebrante di Merka ku e aliansa merikano-oustraliano.
Biden a reuní ku e presidente resien elekto Yoon Suk- yeol, un konservador pro-merikano ku a yega na poder na komienso di mei. Ambos lider a papia pa intensifiká “ehersisionan militar konhunto den i alrededor di e península koreano”.
