WASHINGON, MERKA, AP.- E presidente merikano Joe Biden a bolbe pidi Kongreso djadumingu pa prohibí rifelnan di asalto despues ku un hòmber a basha bala den un sentro komersial den estado di Texas, matando ocho persona, inkluyendo muchanan.
E tiroteo aki na Merka a provoká pániko djasabra na Allen Premium Outlets, un edifisio komersial den siudat di Allen, 40 kilometer na nort di Dallas, kual tabata kompletamente yen ku hende.
Polis a bisa ku un agente tabata na e sitio pa un otro kaso na momentu ku nan a tende e tiramentu alrededor di mitar di kuater di atardi. E agente a enfrentá e sospechoso i a neutralisá esaki, asina e hefe di polis di Allen, Brian Harvey a bisa.
Imágennan di video ku ta sirkulando riba internèt ta mustra un hòmber saliendo di un outo ku el a parker riba e parkerplaats di e sentro komersial i bashando bala riba personanan den e área.
E atakante tabatin ekiponan paramilitar i tabatin un rifel di asalto estilo AR-15.
Departamento di Seguridat Públiko di Texas a identifiká e tiradó komo Mauricio Garcia, di 33 aña i residente di Dallas.
Seis persona a pèrdè nan bida na e sitio i dos mas a fayesé den hospital. Entre nan tin algun mucha, segun indikashon di Kas Blanku.
Presidente Biden, partidario di leinan mas estrikto pa karga arma, a bolbe urgi Kongreso pa tuma medidanan.
Pero ta poko probabel ku su petishon ta wòrdu skuchá pa motibu ku e republikanonan ku ta kontrolá Kámara di Representante ta kontra di medidanan mas estrikto pa karga arma.
