BROWNSVILLE, MERKA, AFP.- Por lo ménos shete persona a muri djadumingu na sùit di Texas i vários mas a sali heridá despues ku un outo a kore dal den grupo di hende ku tabata wardando bùs dilanti di un sentro di yudansa na migrante, segun indikashon di polis.
Outoridatnan a bisa ku ta atendiendo e insidente komo un aksidente, ounke testigunan a bisa AFP ku e shofùr a grita insultonan den direkshon di e grupo promé ku el a dera tròt.
E outo a pasa den lus kòrá i dal e grupo alrededor di 8:30 or di mainta na Brownsville segun indikashon di polis.
El a bisa ku shete persona a muri i kasi 10 mas a resultá heridá.
E shofùr, kende a keda transportá pa hospital, a keda detené pa testigunan te na momentu ku polis a yega. Outoridatnan ta investigando si e aksidente fatal tabata intenshonal òf un aksidente.
E víktimanan tabata entre un grupo di 25 persona wardando na parada di bus, segun e direktor ehekutivo di Ozanam Center, un refugio pa hendenan sin dak ku ta keda den e mesun kaya.
