LAGOS, NIGERIA, AP.- Insurgentenan di Boko Haram a debolbé 104 di e 110 muchanan sekuestrá un luna pasá, den un internat di Nigeria, ku un atvertensia menasando, segun testigunan a indiká djárason.
E kombatientenan a yega Dapchi alrededor di 02:00 di mardugá den nuebe vehíkulo i a laga e hóbennan den e sentro di e lokalidat. Segun e residentenan tabata sali di nan kas yená ku miedu, e ekstremistanan a bisa “esaki ta un atvertensia pa boso tur”, asina un di e bisiñanan, Ba’ana Musa, a informá na The Associated Press.
“Nos a hasi esaki pa lástima. I no hiba boso yunan skol nunka mas”, asina e radikalnan a bisa na e residentenan. Boko Haram ta nifiká “edukashon oksidental ta prohibí”.
“Ningun reskate no a wòrdu pagá”, asina La Mohammed a splika via un komunikado, kende ta minister di Informashon. E liberashon a keda hasí “danki na esfuersonan pa un kanal sekundario i ku e yudansa di algun amigu di e pais, i no tabatin ningun kondishon”.
E sekuestro masivo i e kontesta di gobièrnu a rebibá un rekuerdo doloroso di e atake kontra e skol di Chibok na aña 2014. E tempu aki, e kombatientenan di e milisia radikal a sekuestrá 276 mucha, di kual alrededor di un sentenar no a regresá nan kas nunka mas. Algun a wòrdu fòrsá pa kasa ku nan sekuestradónan i mayoria a haña yu ku esakinan tambe.
Mayoria residente di Dapchi a hui di e lokalidat djárason mardugá despues di haña sa ku e ekstremistanan tabata dirigiendo pa e lokalidat.
“Nos a hui, pero desde kaminda nos tabata, sorprendentemente por a mira nos yunan saliendo di e outonan”.