RIO DE JANEIRO, BRASIL, AFP.- Presidente brasilero, Jair Bolsonaro, a lansa su kandidatura djadumingu pa reelekshon. E akto na Rio de Janeiro a keda marka pa atakenan violento kontra korte di hustisia, i kontra su atversario prinsipal, Lula.
Bolsonaro a usa e evento komo plataforma pa pidi su siguidónan pa “Sali riba kaya un último biaha” riba 7 di sèptèmber. El a kritiká Supremo Tribunal Federal i añadí ku nan mester “komprondé kiko bos di pueblo” por hasi.
E ofisialisashon di Bolsonaro komo kandidato pa elekshon di 2 di òktober a sosodé den konvenshon di Partido Liberal (PL) na Rio. Segun organisadónan, 12 mil persona a sigui e diskurso.
E ultraderechista a papia durante mas ku un ora den gimnasio Maracanazinho, kaminda tabatin un klima festivo. Sin embargo, aparte di ataka Korte máksimo, Bolsonaro a menshoná e vulnerabilidat di urnanan elektróniko segurando ku su “siguidónan no ta pèrmití froude”.
Bolsonaro a paresé riba esenario ku promé dama, Michelle Bolsonaro, i su kandidato pa visepresidente, general Walter Souza Braga Netto.
