ROMA, AP.- Migrantenan angustiá a konta esnan ku a reskatá nan ku vários boto a pasa sin ofresé yudansa. Asina un grupo di asistensia europeo a bisa djadumingu miéntras e tabata buska un haf safe pa mara ku 141 migrante na bordo.
Debí na e prohibishon resien di Italia i Malta di permití botonan di yudansa ku migrante pa mara, e barkunan ta ninga di hasi reskate awor “debí na riesgo haltu di keda sin por mara un kaminda i e falta di un haf safe”, asina SOS Mediterranee a bisa.
Djabièrnè, e barku Aquarius di e organismo, ku ta operá den e sosiedat ku Médiko sin Frontera a reskatá 141 migrante na kosta di LIbia. Di nan, 25 a wòrdu haña ta flota den botonan di palu sin motor. Posiblemente nan tabatin 35 ora den awa segun e grupo a indiká. Mas despues riba e dia, 116 persona mas a wòrdu reskatá, ku entre otro 67 menor sin kompaño.
Kasi tres kuart parti di esnan reskatá ta migrantenan di Somalia i Eritrea. Mayoria migrante a konta kon nan a wòrdu “detené den kondishonnan inhumano na Libia”, kaminda e trafikantenan humano ta basá, segun e organismo.
“E kos di mas importante ta pa e sobrebibientenan wòrdu hiba pa un lugá safe sin retraso, kaminda nan por kubri nan nesesidatnan básiko i kaminda nan ta wòrdu protehá di e abusu”, asina Nick Romaniuk, koordinadó di búskeda i reskate a bisa, segun indikashon di e grupo. Mayoria na bordo tabata debil.
Den yüni, Aquarius a wòrdu forsa pa dirigí pa Spaña durante vários dia ku mas di 600 migrante despues ku Italia i Malta a ninga di duna pèrmit pa mara den nan haf. Desde e tempu ei, otro barkunan privá di reskate mester a warda vários dia pa algun pais permití e migrantenan pa sali.
