JOHANNESBURG, AP.- E gobièrnu di Botswana a anunsiá djaweps ku a kita e prohibishon pa yag riba olefante, un desishon ku posiblemente lo okashoná protesta di gruponan defensor di animal.
E nashon surafrikano tin e poblashon di olefante mas grandi na mundu, ku un kalkulashon di 130.000.
E anunsio a kousa preokupashon pa e posibel oumento di yagmentu ilegal di olefante pa bende esaki su djente.
“Nos lo bai mira matansanan masivo”, segun indikashon di e direktor general di WildlifeDirect, Paula Kahumbu, riba Twitter, agregando ku e efekto di e desishon di Botswana lo impaktá Afrika kompleto.
Botswana ta un refugio pa olefantenan den un kontinente kaminda míles di e animalnan aki a wòrdu di yag durante vários aña pa su djente. Desde hopi tempu kaba e animalnan ta un atrakshon turístiko. Algun persona a atvertí ku turistanan por bòikòt e pais si e prohibishon wòrdu anulá. Ellen DeGeneres tambe a uni e protestanan.
E kambio di regulashon ta sosodé meimei di un konflikto kresiente entre e ser humano i olefantenan, segun e gobièrnu di Botswana a indiká den un komunikado. El a agregá ku e yagmentu lo “reanudá di forma ordená i étiko” pero e komunikado no a detayá kon esaki lo wòrdu regulá.