RIO DE JANEIRO, AP.- Diferente bisiña di Complexo do Alemao, un di e favelanan mas grandi den e siudat, a marcha indigná djasabra, pa eksihí gobièrnu pa hasi algu kontra e violensia kresiente, despues ku un mucha muhé a wòrdu alkansá pa un bala i muri.
Agatha Sales Felix, di ocho aña, a wòrdu heridá djabièrnè anochi durante un konfrontashon entre polisnan ku tabata den e komunidat i supuesto delinkuente.
E menor a wòrdu transportá pa un hospital na parti nort di e siudat, pero no a resistí e heridanan i a muri djabièrnè mes. E bisiñanan di Alemao ta kulpa polis pa su morto. outoridat a kuminsá ku un investigashon di e insidente aki.
Segun vershon ofisial, e agentenan tabata na un skina di e favela na momentu ku nan a wòrdu sorpresá for di vários ángulo. No a reportá mas herido ni personanan detené durante di e insidente aki.
Agatha ta e di sinku menor ku a muri inosentemente durante di un tiroteo den 2019, segun indikashon di Fuego Cruzado, un plataforma ku ta monitòr violensia den estado di Rio.