WILLEMSTAD.- Durante akshonnan “Ta basta awor” ku Kuerpo polisial huntu ku Ministerio Públiko a ehekutá den temporada di karnaval, polisnan dia 11 di febrüari último durante un kontròl di listramentu, a haña e hòmber J. Servania (28) ku un kuchú basta grandi den su poder.
Esaki tabata motibu ku e akusado a keda detené mesora i hibá warda di polis.
Na polis e akusado a deklará ku e tabata kana ku e kuchú, pa motibu ku den pasado el a hañ’é den problema i a wòrdu hinká.
El a bisa ku karnaval mayoria bia ta trese hopi problema i p’esei e mester a kana ku e kuchú pa defendé i protehá su su mes.
Fiskal Dennuai –Simon a duna di konosé ku karnaval ta un periodo kaminda tin aglomerashon di hopi hende riba vianan públiko i tambe tin hopi akseso di alkohòl i droga.
Den hopi kaso hendenan ta bebe fuma kombiná ku droga i nan grado di toleransia ta bira hopi ménos pa ku otro.
Esaki ta pone ku un kos chikí por sali fo’i man hopi mas lihé, di kual esaki por yega na kualke akto lamentabel.
P’esei Ministerio Públiko huntu ku Kuerpo polisial a forma timnan spesial pa kontrolá tur siudadano, ku por parse sospechoso i asina purba tene tur hende trankil pa evitá lo peor.
Fiskal ta haña ku apesar ku e akusado a bisa ku e tabatin e kuchú pa e protehá su mes, esaki no ta wòrdu tolerá pa hustisia.
Mirando esaki fiskal ta haña e akusashon legalmente i konvinsentemente probá di kual e akusado mester a paga e montante di 500 florin di but. Pa motibu ku e akusado no a paga esaki promé ku dia 28 di febrüari último, e but a suma bira fl 600,- òf 12 dia den prizòn.
Hues van Edelenbos a duna di konosé ku e akusado a bisa tambe ku e mester tabatin algu pa defendé su mes i esaki ta netamente algu ku hustisia ta trata na evitá.
Segun hues, aña pasá e akusado a ser kondená pa arma kandela huntu ku un rapòrt di Reclassering.
Hues al final a bai di akuerdo ku e demanda di fiskal.
