MARIPOSA, CALIFORNIA, MERKA, AP.- Siudat di mariposa, ku durante verano normalmente ta yena ku bishitante na Parke Nashonal di Yosemite, tabata kasi bashí djabièrnè, debí na e presensia di shinishi i huma derivá di un kandela serkano ku a kima 58 kas i 60 instalashon.
E siniestro den Sierra Nevada a menasá sentenar di kas i instalashonnan históriko.
E kandela, ku no a krese signifikativamente durante anochi, a kima kasi 300 kilometer kuadrat, poniendo sigur 1.500 kas na peliger. E kandela a wòrdu kontené pa 15%.
Mas di 3.800 bombero a kombatí e siniestro ku a kousa evakuashon di 5.400 residente di mei desena di siudatnan chikitu.
E kandela a yega kasi un kilometer di Mariposa, pero bomberonan a logra mantené e kandela leu di e siudat dor di konstruí defensanan ku mashin pisa. Asina e bosero di Bombero di California Jason Motta a bisa.
Den su momentu mas kritiko, e siniestro tabata 56 kilometer di e frontera ku Yosemite, kaminda e kampamentunan ainda tabata habri. Asina bosero di parke Scott Gediman a bisa.
E kandela a sera un di e kareteranan ku ta yega e parke, ku no tabata den peliger debí ku e kandela a avansá pa parti sùit.