SACRAMENTO, CALIFORNIA, MERKA, AP.- E multimionario Californiano Tom Steyer a anunsiá djabièrnè ku lo dediká por lo ménos 10 mion dòler na un kampaña publisitario na nivel nashonal pa promové un huisio na polítiko di presidente Donald Trump.
Den e anunsio aki, Steyer a bisa ku Trump mester wòrdu destitui paso el a hiba e pais na bordo di un guera nuklear, el a influensiá hustisia den FBI i a menasá di sera organisashonnan di prensa ku e no gusta. E ta pidi públiko pa yama nan kongresistanan i bisa nan pa inisiá un proseso di huisio polítiko.
Steyer tin plania di gasta un suma di 8 digito pa publiká anunsionan nashonalmente, pero no a duna un suma eksakto. Su invershon ta produsí na momentu ku e kier presentá komo kandidato den senado i miéntras kongresistanan demókrata na Washington ta diskutí riba si ta sensato pa purba enhuisiá e presidente polítikamente.
Kas Blanku no a komentá mesora riba e kampaña.
Ademas, Steyer a bisa ku e lo gasta plaka den un kampaña di anunsio riba Internèt.
Un resolushon di huisio polítiko presentá siman pasa pa e representante demókrata Al Green a frakasá promé ku el a wòrdu someté na voto. Green a primintí di bolbe intentá esaki.
