WILLEMSTAD.- Entre 6 i 11 di Aprel ultimo Kòrsou tabata anfitrion pa CARIFTA Akuátiko. Curaçao Aquatic Association por mira atras riba un kampionato sumamente eksitoso i na un nivel hopi haltu organisá.
Irelnety Copra, ku ta e kordinadó pa CARIFTA Aquatics 2023, ta splika EXTRA ku durante di e kompetensia tabata 26 rèkòrt a keda kibrá Segun Copra esaki ta algu hopi special. “I na mi opinion esaki ta bisa algu tambe tokante e kalidat haltu di Pisina Enith Brigitha, ku ta e pisina na SDK.”
Manera ta konosí pa Kòrsou e atleta Andreia Fereira tabata e úniko ku ta logra un medaya pa Kòrsou den natashon, esaki den kategoria di 14/15 aña. Miéntras ku Jayden Loran i Jayen Viscaino a yega den e tòp ocho. Banda di natashon den Pisina Enith Bregitha tambe partisipantenan a kompetí den kategoria waterpolo di playa, landamentu artístiko i “Open Water”. Den e kategoria di landamentu artististiko Kòrsou a haña hopi medaya (sinku di oro, sinku di plata I tres di brons).
Copra ta satifecho di henter e 36 edishon di CARIFTA Aquatic Championship. “Nos ta spera ku esaki lo tin komo konsekuensia ku mas hoben riba nos isla lo partisipa den disiplina akuátiko I komo konsekuensia nos lo stimula mas talentonan.” Copra tambe ta enfatisa ku organisashon di CARIFTA ta bon pa nos ekonomia I pa imahen di Kòrsou komo pais di deporte.
Copra: “Un danki di kurason na tur sponser, partner, miembronan di organisashon i boluntarionan pa kere den CARIFTA 2023 i duna nan sosten.”
Pa organisashon di CARIFTA 2025 Kòrsou lo hasi un ‘bid’, ku ta nifiká ku Kòrsou ta habri pa organisá e torneo un bia mas. CARIFTA tambe den aña 2025 lo tuma lugá durante wikent di Pasku.
E aña aki tabata e promé biaha ku pais Kòrsou a organisá CARIFTA. Promé ku 2010 Antias a organisá e evento aki na aña 2005. E aña aki un total di 22 pais a partisipá, den total mas ku 400 atleta a partisipá.
