SANTIAGO, CHILE, AFP.- E gobièrnu di Chile a dekretá djaluna ku mester usa masker obligatoriamente ora di usa transporte públiko. E pais a registrá 4.815 persona infektá i 37 morto dor di e Coronavirus.
E uso obligatorio di masker den tantu transporte públiko komo privá ta sigui e rekomendashon ku e gobièrnu a hasi djadumingu, pa usa e tipo di protekshon di kara aki den espasionan públiko, inkluyendo den supermerkado, konforme e rekomendashonnan nobo di Organisashon Mundial di Salú (OMS).
E pais a registrá un oumento di 344 infekshon nobo i tres morto kompará ku djadumingu.
E medida nobo ta impliká uso di masker de bùs, taxi, metronan di Santiago i buelonan nashonal ku ta operando ainda. Desde djadumingu, tur outoridat mester paresé den públiko usando masker kirúrgiko.
Debí na e skarsedat mundial di masker, e ministerio di Salú di Chile a publiká vários tutorial pa fabriká esaki na kas usando tela. E strategia di kontenshon adoptá pa Chile ta kontemplá karentenanan selektivo i progresivo i e aplikashon masivo di tèst di Coronavirus.
