BEIJING (AP).- Djadumingu China a duna di konosé ku e lo trese ahuste den kompra di produktonan merikano si Presidente Donald Trump dal bai ku ponementu di rekargo balorá na biónes di dòler riba produktonan chines. Pero konseheronan di Kas Blanku a insistí pa sigui ku kambionan fundamental entre e dos podernan ekonómiko di mas grandi na mundu. E atvertensia di China a bini despues ku delegashonnan enkabesá pa e Sekretario di Komersio Merikano, Wilbur Ross i un tòp ofisial ekonómiko di China, vise presidente Liu He, a terminá den un reunion riba e petishon na Beijing pa baha su surplus komersial.
Ross a duna di konosé na inisio dje evento ku nan a diskutí riba sierto produktonan di eksportashon merikano ku China lo por kumpra, pero e kombersashonnan a terminá sin un deklarashon konhunto i di ningun banda nan no a divulgá detayes.
“Ta parse ku ámbos banda a disidí di para mas duru den e negosiashonnan i ta warda pa e otro partido entregá”, asina Eswar Prasad, profesor den polítika di komersio na Cornell University, a duna di konosé. “No opstante e potensial reperkushonnan negativo pa ámbos ekonomia, e riesgo pa un guera ekonómiko kompleto entre China i Merka, ku tarifa i otro sanshonnan ku ta ser imponé di ámbos banda, a bira signifikantemente mas real”.
