BEIJING, AP.- China a manda personal i ekipo sanitario pa un hospital resien konstruí. Aparte di esaki e pais a inyektá plaka den merkadonan finansiero i a oumentá restrikshonnan pa e pueblo move liber komo un di e medidanan mas estrikto aprobá djaluna. E intenshon ta pa kontené tantu e vírus ku ta ekstendiendo rápidamente komo esaki su impakto kresiente.
Beijing a reportá 361 morto te ainda i 2.829 kaso nobo na China durante e último 24 oranan ku a pasa. E total di kasonan a oumentá na 17.205 den e pais kompleto, miéntras ainda otro paisnan ta evakuando su siudadanonan di provinsia di Hubei, esun mas afektá. Siudadanonan chines òf personanan ku a bishita e pais resientemente a haña restrikshon di biahe. Organisashon Mundial di Salú a señalá ku e kantidat di kasonan ta sigui subi dor ku míles di posibel pashènt tabata riba lista di espera pa tèst pa e vírus.
Outoridat a konstruí un hospital di 1.000 kama den e kapital provinsial, Wuhan den apénas 10 dia. Un otro hospital ku por akohé 1.500 persona lo habri dentro di algun dia. e restrikshonnan den e siudat a bira mas fuerte, permitiendo solamente un miembro di kas pa sali riba kaya pa hasi kompra kada pasa dia.
“E falta di kambernan di hospital a obligá algun pashènt infektá pa regresá kas, kual ta ekstremadamente peligroso. Pues kamanan adishonal ta un gran mehorashon”, asina e epidemiólogo chines Zhong Nanshan a bisa.
