CHICAGO (AP).- Mayoria di hende muhé ku den futuro lo sufri di e forma mas komun di e promé fase di kanser na pechu, sin muchu problema lo por pone kimoterapia un banda numa sin influensiá e posibilidatnan pa gana e bataya kontra dje malesa aki. Esei di akuerdo ku un estudio ku a ser hasí riba henter Merka i den kual a hasi uso di testing genétiko pa midi e riesgo di kada pashènt. E estudio aki ta esun di mas grandi ku hamas a ser hasí riba tratamentu di kanser na pechu, miéntras ku nan ta spera ku e resultado lo spar alrededor di 700.000 pashènt na Merka i hopi otro rònt mundu di e odisea i e gastunan envolví.
“E impakto ta tremendo”, asina e lider dje estudio, dr. Joseph Sparano di Montefiore Medical Center na New York, a duna di konosé. Mayoria di hende muhé den e situashon aki no tin mester di tratamentu despues di siruhia i terapia di hormona, el a bisa. E estudio a ser finansiá dor di e Instituto Nashonal di Kanser, algun otro fundashon i donantenan privá na Merka i entradanan di stampia kontra kanser.
Den e estudio a duna 10.273 pashènt un tèst ku yama “Oncotype DX”, den kual ta hasi uso di un muestra di biopsia pa midi e aktividat di e genenan envolví den kresementu di sèlnan i nan reakshon riba terapia di hormona pa asina kalkulá e riesgo si e kanser lo desaroyá.
