BOGOTA, COLOMBIA, AFP.- Awaseru fuerte na nortwèst di Colombia a desplasá un kantidat di tera ku a dal kontra un karetera, tragando un bùs i otro vehíkulonan i matando 34 persona, segun indikashon di servisionan di emergensia djaluna.
E desplasamentu di Tera di djadumingu anochi a provoká un gran esfuerso di reskate, ku desénas di persona buskando víktimanan bou di e tera.
“Tin 34 morto i nuebe herido”, asina Diana Ramirez, di Unidat Nashonal pa Maneho di Riesgo i Desaster (UNGRD) a bisa na AFP.
Entre e heridonan, tres a logra sali na bida for di e bùs, i seis mas di un otro vehíkulo ku tambe tabata na e sitio di e aksidente.
E presidente Gustavo Petro a bisa anteriormente ku tabatin por lo ménos 27 morto, inkluyendo tres mucha, den e tragedia ku a golia e pueblo di Pueblo Rico, miéntras ku esfuersonan di reskate ta kontinuá.
E temporada di áwaseru ku a kuminsá den ougùstùs ta esun di mas pió den Colombia den 40 aña, segun gobièrnu, provokando aksidentenan ku a laga mas ku 270 morto.
E pais a deklará desasternan nashonal pa áwaseru vinkulá ku e fenómeno meteorológiko largu di La Niña, kual ta baha temperaturanan riba superfisie i ku aktualmente ta kousando sekura i inundashonnan rònt mundu.