UVALDE, MERKA, AFP.- E pueblo chikí di Texas Uvalda, serka di e frontera ku Mexico a kuminsá ayera ku entiero di e 19 muchanan asesiná den e tiroteo den un skol básiko ku a kousa konmoshon na Merka siman pasá, un di esnan di mas pió den último añanan na e pais.
E kurpa di Amerie Jo Garza di 10 aña a yega den un kaha di morto koló plata i a keda transportá pa e misa katóliko Sagrado Corazpon pa seis kargadó ku tabatin kamisanan blanku bistí i flor kòrá.
E famia i amigunan, algun bisti ku kolo lila ku ta kolo di e skol básiko Robb para na otro banda di kaya, esenario di e masakre di dia 24 di mei, a reuní dilanti di e misa promé ku e entiero mei mei di hopi polis ku tabata presente.
E mucha muhé Maite Yuleana Rodriguez tambe di 10 aña, a keda dera ayera, ku mas seremonia programa pa e próksimo simannan, inkluyendo esnan di e dos maestronan ku a muri. Tur a keda asesiná ora djamars siman pasa ora Salvador Ramos di 18 aña a tira den un klas promé ku el a keda matá pa polis.
Mei mei di doló, na Uvalde tambe tin rabia pa e forma kon polis a atendé, hopi krítika pa a tarda asina tantu promé di a tira e pistolero. Un di e desishonnan eróneo, atmití pa e direktor di e departamento di seguridat públiko di Texas, Steven Mc Craw. “Por bisa mi ku a kometé un eror, i ku tabata un desishon robes pero no ta trese bèk mi bisañetu”, asina Ruben Mata Montemayor di 78 aña, bis-abuelo di un di e víktimanan a bisa.
