CARACAS, VENEZUELA, AFP.- Dos merikano a wòrdu detené djaluna pa un “invashon” frakasá na Venezuela kual a laga 15 detenido, segun indikashon di presidente Nicolás Maduro. E Fiskal di Venezuela ta akusá e lider opositor Juan Guaidó di kontratá “mersenarionan” pa e atentado aki.
“Dos merikano miembro di seguridat” di presidente merikano Donald Trump a wòrdu detené, segun indikashon di Maduro na Televishon. Ta trata di Luke Denman di 34 aña i Airan Berry di 41 aña, segun e gobernante chavista, kende a mustra nan pasport i sobrá dokumento na e kanal di televishon estatal VTV.
No a konfirmá ku e dos personanan aki ta pertenesé na e ekipo di seguridat di Trump, manera Maduro ta insistí. Despues di dos aresto djadumingu, 13 persona a wòrdu detené djaluna, segun indikashon di Maduro.
E Fiskal di Venezuela a akusá Guaidó anteriormente di kontratá e “mersenarionan” ku fondo di Venezuela di fris dor di e sanshonnan di Washington.
