RIO DE JANEIRO, AP.- Dos polis militar brasilero a wòrdu detené enkonekshon ku un turista spañó ku a muri tirá na momentu ku el a bishitá un di e favelanan mas grandi di Rio de Janeiro, segun informashonnan djamars.
Maria Esperanza Jimenez Ruiz a wòrdu tirá den garganta djaluna na momentu ku e vehíkulo ku e tabata biaha aden a ignorá un puesto di kòntròl den favela di Rocinha. E muhé, di 67 aña di edat, a wòrdu hiba pa hospital pero a muri komo konsekuensia di su heridanan.
Polis ta insistí ku nan a duna òrdu pa para i ku e outo a sigui kore i ku nan no por a mira ken tabata den esaki debí ku e vehíkulo tabatin bentana skur, segun inspektor polisial Fabio Cardoso. E shofùr a bisa ku nan no skucha un òrdu pa para.
“Mi kier pa un kos ta bon kla. Si un outo no obedesé un òrdu pa para, esaki no ta hustifiká ku polis ta tira riba e outo”, asina Cardoso a bisa djamars den un konferensia di prensa.
El a anunsiá ku e teniente polisial Davi dos Santos Ribeiro tabata den e outo di tiru fatal i ku el a wòrdu detené djaluna, pa sospechoso di asesinato. El a agregá ku un otro ofisial a wòrdu detené kende su nòmber no a wòrdu publiká i kende a tira den aire. Seis arma di kandela a wòrdu konfirmá.
E morto ta un otro ehèmpel di e violensia kresiente na Rio de Janeiro un aña despues ku esaki tabata anfitrion di olimpiada den verano. E echo sigur lo oumentá denunsiánan kontra polis militar, akusá di tira inhustifikadamente, i kontra agensianan di turismo ku ta hiba turistanan na zonanan peligroso.
