WILLEMSTAD.- Parlamentario Elvin Gerard tei manda un karta pa minister Cooper i minister Silvania pa drei bèk e desishon di pone 500 mil florin pa dòrna sentro di siudat fin di aña. E ta rabiá ku e desishon aki i ta konsider’é algu insólito.
Den entrevista ku EXTRA sr. Elvin Gerard ta bisa di no por komprondé kon tin tantu hende grandi, hendenan ménos pudiente ku no tin awa i koriente na nan kas i fin di aña ta sòru pa dòrna siudat. E hendenan sin awa i koriente aki enbèrdat no a paga, pero ta pasobra nan no tabata por a paga. Si e famia no tin 300 florin pa luna e no por tin awa i koriente na su kas. I ta netamente e hendenan aki tin di yuda segun Gerard.
E parlamentario a sigui bisa ku tin mas di seis pa shete mil kas sin awa i koriente na Kòrsou. Kas di hendenan ku ta kobra penshun i awor ta kue mei mion florin pa dòrna Punda i Otrobanda pa 3 siman. E ke sa dikon no ta yuda esnan ku ta kobra ònderstant i penshun. Dikon no ta parti e sèn den 250 mil pa usa un parti pa suavisá e hendenan ku ke pasa Pasku i aña nobo tambe ku lus i awa den nan kas.
E ta un situashon inhustu. E kos aki ta inkreibel. “Mi ta kuestioná e kos aki i mi ta pidi pa awe den Konseho di minister drei e desishon aki bèk sino pa otro siman mi ta yama un samenwerkende partijen”, Elvin Gerard a bisa den e entrevista ku EXTRA.
E ta spera tambe ku mas parlamentario lo Sali i kuestioná e desishon aki. E ta kere ku mester laga CTB invertí pa dòrna Punda i Otrobanda i no usa sèn di pueblo pa esaki.
