NEW YORK, AP.- Michael Cohen, eks abogado di presidente Donald Trump a deklará kulpabel djaweps di a gaña Kongreso tokante un trabou ku el a hasi pa un negoshi di Trump na Rusia.
Trump a bisa ku Cohen ta un “persona debil” ku ta purba haña un kondena mas abou.
Kompaña pa su abogadonan, Cohen a konfesá di a gaña tokante e kronologia di e negosiashonnan i otro detayenan. Cohen a indiká ku el a gaña debí ku e kier a keda “leal na Trump”.
Cohen a bisa na hues ku el a gaña dilanti di Kongreso, afirmando ku tur kombersashon relativo na e konstrukshon di Trump Tower na Moscow a finalisá promé ku yanüari 2016. En realidat esakinan a kontinuá te den yüni 2016. Ademas, el a gaña tokante su kontakto ku funshonarionan ruso.
Fiskalnan a bisa ku Cohen a gaña den Kongreso pa krea e impreshon falsu u e proyekto na Moscow a terminá promé ku votamentu republikano di aña 2016.
Trump a bisa ku “Michael Cohen ta gaña i ta purbando di haña un sentensia mas leve”.
Nada di loke a wòrdu papia den korte òf dokumentonan korespondiente ta referí si Trump òf su kolaboradornan a instruí Cohen pa gaña dilanti di Kongreso.
Cohen a deklará di algun akusashon federal relashoná ku su empresa di taksi, froude bankario i su trabou pa e kampaña presidensial di Trump.
E kargonan a wòrdu presentá pa fiskal Robert Mueller, kende ta investigá e intervenshon ruso den elekshon presidensial di 2016.
