FREETOWN, SIERRA LEONE, AP.- E presidente di Sierra Leone a deklará emergensia nashonal pa violashon i intimidashon seksual, i a bisa ku e agresornan ta kada biaha mas hóben i nan aktonan mas violento.
Tur luna di nobo e pais ta registrá sentenar di kasonan di violashon i intimidashon seksual, segun indikashon di presidente Julius Maada Bio den un diskurso di apertura djaweps. E kasonan de e pais na West di Afrika ta spesialmente kontra hende muhé, mucha muhé, beibi, i algun di nan solamente tres luna bieu.
E presidente a bisa ku 70% di e víktimanan tin ménos di 15 aña i a atvertí ku esnan ku agredí menornan seksualmente ta kore rísiko pa wòrdu kondena na bida largu den prizòn. E lei aktual ta permití un sentensia máksimo di 15 aña i masha tiki hende ta wòrdu sentensia.
E deklarashon di Bio ta yega despues di vários luna di aktivismo.
Míles di kaso ta keda sin wòrdu reportá debí na un kultura di silensio òf indiferensia, loke ta laga e víktimanan troumatisá.
El a ordená e kreashon di un divishon polisial spesial kontra violashon i violensia seksual kontra menornan di edat.
