WALLOPS ISLAND, VIRGINIA, MERKA, AP.- Un funshonario di NASA kende supervisá un kontrakt di kasi 200 mion dòler den e Instalashon di Buelo di Wallops na Virginia, a deklará kulpabel di haña soborno i hòrta fondonan di gobièrnu.
Medionan di prensa a informá djamars ku Steven Kremer di 53 aña, a deklará kulpabel pa 37.000 dòler di froude, despues di a renunsiá na mei.
Segun dokumentonan di korte, e hefe di Range and Mission Management Office, a haña uso grátis di e kas di fakansi di un muhé entre 2008 i 2015, a kambio di yuda e kompania di diseño interior pa haña un kontrakt na Wallops Island. E dama a yuda Kremer pa atkerí arte usando fondonan di gobièrnu.
Dokumentonan di korte ta mustra ku Kremer a usa fondonan di e kontrakt pa kumpra tarhetanan di regalo.
Kremer lo wòrdu sentensia den mart. Su abogado no a komentá al respekto.
NASA no a identifiká e kontratistanan involukrá.