NEW YORK, AP.- Michael Cohen, un persona ku tabata un abogado deboto di Donald Trump, a wòrdu kondená na tres aña di prizòn despues di a indiká ku su “lealtat siegu” a pone ku el a enkubrí e “trabou shushi” di Trump.
El a wòrdu sentensiá pa krímennan ku ta inkluí engaño tokante akuerdonan komersial ku Rusia i desviá plaka destiná pa dos dama ku a afirmá di tabatin relashon seksual ku Trump. Fiskalnan general i tambe Cohen a indiká ku e pagonan a wòrdu hasí ku instrukshon di Trump pa evitá ku su intento pa yega Kas Blanku ta wòrdu dañá.
Durante e dos añanan di investigashon, Cohen ta e promé i úniko miembro di e sirkulo di Trump ku ta paresé den korte i impliká e presidente di un krímen. No ta evidente si e presidente por wòrdu prosesá,
Trump a ignorá e pregunta di reporteronan tokante Cohen.
E hues di distrito William H. Pauley III a bisa ku e abogado meresé krédito modesto pa atmití kulpabilidat i kooperá den un investigashon federal tokante e intentonan di Rusia pa influensiá elekshon presidensial den Merka. E hues a ordená Cohen pa paga 1,39 mion di kompensashon na Servisio Interno di Impuesto, renunsia 500.000 dòler i paga 100.000 na but. El a wòrdu ordená pa presentá den prizòn riba 6 di mart i a bandoná sala sin dirigí ningun palabra.
