ANKARA, AP.- E presidente turko Recep Tayyip Erdogan a pidi Union Europeo pa e bloke sostené e gobièrnu libio na Tripoli, rekonosé internashonalmente.
Den un artíkulo publiká riba e wepsair “Politico”, Erdogan a bisa ku e gobernantenan europeo “mester papia ménos i konsentrá mas riba nan akshonnan” pa e pais nortafrikano ku ta pasando dor di un guera sin final.
Erdogan a reuní ku mandatarionan oksidental, árabe, di Rusia i hefenan di e fakshon libio den kapital di Alemania pa purba pone fin na nuebe luna di kombate den área di Tripoli.
Turkia i Rusia a anunsiá un tregua un siman pasá, ounke tabatin diferente kombate ku a tuma lugá desde e anunsio.
Turkia ta sostené e gobièrnu respaldá pa Nashon Uní na Tripoli, enkabesá pa Fayez Sarraj i a manda trupanan pa yuda ku un bataya kontra forsanan di e general Khalifa Hifter.
