SIUDAT DI MEXICO, AP.- E Monumento di Independensia di Siudat di México a keda mancha ku grafiti durante un protesta femenista, ku a bira violento. E damanan a manifestá kontra e kasonan di violashon di agentenan polisial kontra hende muhé.
E susesonan di djabièrnè anochi a sali for di man i ta forma parti di e protestanan efektuá e siman aki, debí na e manifestantenan su persepshon ku outoridat no ta investigando e akusashonnan di violashon di forma adekuá. Ambos víktima tabata adolesente.
Trahadónan di e siudat a kuminsá limpia den oranan trempan di mainta i eliminá e grafitinan dor di kubri esaki ku pintura.
Un reportero di televishon a keda ataká i a destrosá su bùs di notisia tambe. El a wòrdu agredí pa un hòmber i no un muhé.
E hefe di gobièrnu di Siudat di México, Claudia Sheinbaum, a bisa riba Twitter ku Prokurador General di Hustisia di metropolis lo investigá i akusá tur esnan ku a agredí periodistanan.
E sekretario di Kultura di e kapital, Jose Alfonso Suarez del Real, a ekspresá su tristesa pa e aktonan di vandalismo kontra monumento di Angel. El a indiká ku e monumento “no ta pertenesé na estado, pero na e pueblo mehikano”.
E monumento ta kontené restu di 14 héroe di independensia.
Violensia kontra hende muhé ta un problema grave na México. Human Rights Watch a indiká ku e leinan mehikano “no ta protehá e hende muhé i adolesente di violensia di famia i seksual manera mester ta”.
