SAN FRANSISCO, MERKA, AFP.- Facebook a disolvé un ret di 120 kuenta impliká den un operashon pa promové kampaña di relekshon di presidente Donald Trump. E kuentanan tabata wòrdu manehá for di Rumania i a disolvé algun kuenta for di Instagram tambe, segun indikashon di e empresa.
E outornan di e operashon tabatin diferente kuenta falsu pretendiendo di ta merikanonan simpatisadó di e mandatario republikano.
E ret a publiká kontenido tokante e kampaña, eksaltando Trump su sosten na e komunidat afroamerikano, kristian i e movementu Qanon.
Ámbos ret sosial a eliminá mas di 1.000 kuenta “ilegal” kual tabatin intenshon di gaña e públiko tokante nan intenshon òf orígen.
Facebook ta hasiendo mas esfuerso pa kontrarestá informashon falsu i interferensia di estranhero den e periodo promé ku elekshon presidensial di Merka 3 di novèmber.
Facebook a desbaratá un otro kampaña den yüli, pero esaki tabata dirigí na e pueblo chines.
Esnan tras di e kuentanan a publiká kampañanan di notisia, protestanan na Hong Kong, e polítika di Merka kontra China i kritiká kontra e gobièrnu chines, segun indikashon di Nathaniel Gleicher, e direktor di regulashon di ‘cybersecurity’ di Facebook.
