MADRID, Spaña, AFP.- Tripulantenan di kabina Easyjet na Spaña a disidí pa pone fin na un wèlga ku a kuminsá na komienso di yüli despues ku a yega na un akuerdo ku e kompania ku ta inkluí subida di salario, segun indikashon di sindikato USO.
E organisashon a lansa un serie di wèlga di tripulantenan di Easyjet den aeropuertonan di Barcelona, Malaga i Mallorca, ekstendé durante luna di yüli, pa eksihí mihó kondishon laboral.
E paronan aki a kousa anulashonnan i retraso di buelonan di e kompania, nèt na komienso di temporada di fakansi.
“Despues di algun siman intenso di negosiashon”, maneho di e empresa i responsabelnan di USO yega na “un akuerdo tokante kondishonnan ekonómiko, aprobá pa asamblea di e trahadónan”, segun indikashon di sindikato den un komunikado.
Despues di e konsenso nobo, e sindikato a anulá e tres dianan di wèlga ku a sobra, programa pa 29, 30 i 31 di yüli.
E akuerdo nobo lo subi salario di tripulantenan di kabina ku 22%. E konvenio nobo ta inkluí kompensashonnan ekonómiko pa empleadonan ku mester traha riba nan dia liber.
