LIMA, PERU, AFP.- Fiskalnan na Perú a hasi un petishon pa èks presidente Pedro Pablo Kuczynski wòrdu sentensiá na 35 aña di prizòn pa motibu di akusashonnan di korupshon relashoná ku e skandal masivo di Odebrecht.
Kuczynski, di 84 aña, ta akusá ku labamentu di plaka i forma un organisashon kriminal ku a haña 12 mion di e empresa brasilero Odebrecht pa konsultanan sekreto.
Odebrecht, kual a kambia su nòmber pa Novonor komo konsekuensia di e skandal, a atmití ku a paga miónes di dòler na soborno den Latinoamérika pa sigurá kontraktnan importante.
Kuczynski lo a usa su kompanianan di konseho finansiero den e kòmplòt di Odebrecht.
Outoridatnan a investigá e kaso kontra Kuczynski pa sinku aña. Despues di tres aña di huisarest el a wòrdu liberá aña pasá.
Na aña 2018, Kuczynski a bira e promé presidente latinoamerikano ku ta retirá pa motibu di e skandal di Odebrecht.
Dos eks presidente mas di Perú, Ollanta Humala (2011-2016) i Alan Garcia (2006-2011) tambe a wòrdu akusá ku korupshon relashoná ku e kaso di Odebrecht.
Humala su kaso den korte a kuminsá den febrüari 2019, i Garcia a kometé suisidio den aprel 2019 despues ku polis a yega na su kas pa arest’é.