PARIS, FRANSIA, AFP.- Fransia a proponé pa manda un mishon internashonal di opservador independiente Xinjiang na nortwèst di China, pa investigá e situashon di Uyghur.
“Nos ta proponé un mishon internashonal di opservador independiente, guiá pa Michelle Bachelet, ku lo biaha pa e region pa opservá”, segun indikashon di e minister di Eksterior franses, Jean-Yves Le Drian.
Mitar di e pueblo di Xinjiang ta konsistí di Uyghur. Mayoria ta musulman i e lenguahe Uyghur ta derivá di e lenguahe turko.
Eksperto i organisashonnan di defensa di derechi humano ta akusá Beijing di a purba interná kasi un mion musulman, spesialmente di e etnia Uyghur den un serie di operashon anti terorista di China.
China ta desmentí e kantidat aki i a bisa ku e hendenan aki ta wòrdu transportá pa un sentro di formashon profeshonal, destiná pa yuda nan haña trabou.
