NEW YORK, MERKA, AFP.- Ghislaine Maxwell a wòrdu sentensiá na 20 aña di prizòn djamars pa yuda Jeffrey Epstein abusá seksualmente di muchanan muhé.
Maxwell no a reakshoná na momentu ku hues Allison Nathan di New York a dikta e sentensia den un sala di korte federal di Manhattan kompletamente yená ku hende.
E sentensia ta muchu ménos ku loke fiskalnan a pidi pero esaki ta nifiká ku e dama lo pasa gran parti di restu di su bida tras di trali.
Nathan a rechasá afirmashonnan di Maxwell ku fiskalnan a persiguí e, pa motibu ku Epstein a skapa di hustisia dor ku el a kometé suisidio den prizòn.
“Ta importante pa nos enfatisá ku ounke Epstein tabata sentral den e investigashon di krímen aki, sra. Maxwell no ta wòrdu kastigá na lugá di Epstein ni komo representante di Epstein”, asina e hues a bisa.
E akusashonnan kontra Maxwell a derivá di delitonan kometé entre 1994 i 2004.
Fiskalnan a demostrá ku e tabata “klave” pa e plan di Epstein. E tabata atraé e hóbennan pa nan duna Epstein masashi, durante kual e tabata abusá seksualmente di nan.