NEW YORK, MERKA, AFP.- E gobernador di New York a anunsiá ku lo amplia e medidanan di lockdown dor di e Coronavirus te ku 29 di aprel.
Apesar ku e kantidat di morto diario kousá pa COVID-19 den estado di New York tabata bou di 600 i bou di e rèkòrt di djasabra último, “e sistema di hospital ta funshonando na su kapasidat máksimo”, asina e gobernador Andrew Cuomo a alertá den un konferensia di prensa.
“E mashin ta kòrá i no por bai mas lihé. I no por keda den kòrá durante un tempu indefiní pasó e sistema lo no wanta esaki. E personal no por traha mas duru. Pues pa keda na e nivel aki ta un problema”, asina el a afirmá. El a sigui bisa ku aworakí no ta e momentu pa bira fleksibel. E but pa violá reglanan di lockdown lo subi di 500 pa 1000 dòler, asina el a anunsiá.
E gobernador a bisa ku e kaida den e kantidat di morto ta duna speransa pero ainda no por saka un konklushon. “E sifra por bolbe subi”. Cuomo a bisa ku ya a superá e kantidat máksimo di mashinnan di hala rosea den hospitalnan di e estado. Pero el a sigurá ku ainda ningun hospital no a sufri pa un skarsedat di mashin di hala rosea.
