CARACAS, AP.- Kuater di sinku gobernador opositor skohe den elekshon di 15 di òktober a huramentá djaluna den Asamblea Konstituyente, integrá den su totalidat pa ofisialisnanan, apesar di konsiderá ku e instansia legislativo aki ta inkonstitushonal.
E kuater miembronan di oposishon ta pertenesé na partido Akshon Demokrátiko i e notisia di su huramentshon a wòrdu konfirmá atraves di Twitter pa Delcy Rodriguez, eks kansier i presidente aktual di Konstituyente.
Mesa di Unidat Demokrátiko, e aliansa integrá pa kasi tres desena di partidonan opositor, a ripití ku su gobernadornan nobo lo no huramentá dilanti di Konstituyente debí na esaki su ilegitimidat. Pero promé ku elekshon, presidente Nicolas Maduro a atvertí ku esnan ku resultá vensedó mester supordiná na e organismo aki pa por asumí su kargonan. Esun ku no hasi esaki, ta pone ku su puestonan por keda bashí i mester organisá elekshon nobo den estadonan ku ta rekerí esaki.
Ademas, e leinan venezolano ta kontemplá un huramentashon dilanti di Asamblea legislativo di kada estado.
Segun algun opositor, e desishon di akatá loke Maduro a bisa ta un deseo pa resolvé e krísis ku e pais suramerikano ta pasando aden.
