CARACAS, AP.- E Fiskal General di Venezuela a bisa ku Juan Guaido mester deklará pa un supuesto kòmplòt kontra e gobièrnu di Nicolas Maduro kaminda el a wòrdu impliká huntu ku eks militarnan.
Guaido, rekonosé komo presidente interino di Venezuela pa kasi 60 pais, a wòrdu pone na altura ku e mester deklará riba señalashonnan ku e general retirá Cliver Alcala Cordones a hasi. Cordones a bisa ku el a firma un kontrakt ku e lider opositor i asesornan merikano pa kumpra arma, segun informashon di e fiskal general Tarek William Saab.
Outoridat venezolano a bisa ku e armanan lo a wòrdu usa pa atentá kontra Maduro i otro figuranan di gobièrnu i generá aktonan violento.
Saab a bisa ku Alcala a konfesá su partisipashon den e echonan aki públikamente i ku e intento pa pasa e armanan aki pa Venezuela i proveé arma na gruponan terorista a wòrdu realisá ku instrukshonnan direkto di Juan Guaido.
Fiskal a inisiá seis investigashon kontra Guaido den e último dieskuater lunanan ku a pasa. pero esaki ta promé biaha kaminda Guaido mester deklará.
Ministerio Públiko a kuminsá ku un investigashon siman pasa, kaminda ta akusá Guaido pa e delito di Gòlpi di Estado komo konsekuensia di e deklarashonnan ku Cordones a hasi na un emisora di Colombia, kaminda e ta biba.
E eks militar a entrega na agentenan di DEA fin di siman. Huntu ku Maduro i vários kolaborador di e presidente, Cordones ta un di e akusadonan ku e gobièrnu merikano ta akusá di a kombertí Venezuela den un imperio kriminal sirbiendo esnan narkotrafikante i terorista.
Alcala Cordones a atmití ku el a kordiná e kompra i traslado di un karga di arma. Esaki a wòrdu konfiská siman pasa na nort di Colombia.
