EL RODEO, GUATEMALA, AP.- Ekiponan di reskate tabata usa mashinnan pisá pa buska sobrebibientenan òf víktimanan di e erupshon volkániko violento di Volcan de Fuego de Guatemala ku a sorprendé residentenan i a laga por lo e ménos 25 morto, un sifra ku outoridat ta teme ku por oumentá segun oranan ta pasa.
E volkan ku ta keda na wèst di e Siudat di Guatemala a hasi erupshon djadumingu mandando nubianan di shinishi i shinishi kayente mesklá ku awa i restunan ku a blòkiá kareteranan i laga vários kas na kandela. Segun ekspertonan e eksploshon tabata esun mas violento den 40 aña.
E zona karbonisá tabata demasiado kayente pa ekstraé e kurpanan di e víktimanan i a kousa ku e sapatu di e unidatnan di reskate a kuminsá dirti. Ekiponan di reskate a bisa ku a haña e kadavernan kubri ku shinishi, kual tabata parse estatuanan.
E direktor di Koordinador Nashonal pa redukshon di desaster (CONRED), Sergio Cabanas, a informá na The Associated Press ku djaluna nan a logra reskatá 10 persona ku helikòpter. Tur a wòrdu transportá pa hospitalnan den serkania.
CONRED a informá ku 3.265 persona a wòrdu evakuá.
Volcan de Fuego, un di esnan mas aktivo den Amérika Sentral, tin un altitut di 3.763 meter riba e nivel di laman den su punto mas haltu.
Hospitalnan a atendé por lo ménos 20 persona pa kemaduranan i problemanan ku halamentu di rosea.
62 kadaver ta wòrdu rekuperá despues di erupshon di volkan
E direktor di e Instituto nashonal di Siensia (INACIF) di Guatemala, Fanuel garcia, a anunsiá di a rekuperá 62 kadaver despues di e erupshon di e Volcan di Fuego.
E kadavernan a wòrdu lokalisá den komunidatnan di Los Lotes i El Rodeo i te ainda a identifiká solamente 13 di e personanan fayesé.
Outoridat guatemalteko a indiká anteriormente ku e sifra di mortonan tabata por lo ménos 25 persona, ounke a wòrdu atvertí ku esaki por keda subí.
Volcan de Fuego na wèst di e Siudat di Guatemala a hasi erupshon djadumingu i habitantenan di algun pueblo serka tabatin tiki tempu pa skapa.
