PORT AU PRINCE, AP.- Un empresario di nort di Haiti ku nunka a okupá un kargo polítiko a keda sertifiká djamars komo ganadó ofisial di e elekshon presidensial na novèmber despues ku un tribunal elektoral a determiná ku no tin prueba di froude elektoral na gran eskala. E konseho elektoral provinsial a publiká e resultadonan definitivo kual ta mustra ku Jovenel Moise a gana e promé rònt ku mas di 55% di votonan e mesun porsentahe ku den e resultadonan promé ku nan a anunsiá na final di novèmber. E kontrinkante ku tabata sigui Moise ta Jude Celestin ku a haña kasi 20%. E difushon di e resultadonan a tuma lugá despues ku un tribunal elektoral spesial a anunsiá ku nan a haña algun iregularidat den e elekshon di novèmber pero no tabata sufisiente pa kambia e resultadonan ku base den e análisis di 12%. Moise di 48 aña ta un empresario ku a keda skohé pa e presidente Michel Martelly pa e postulá su mes komo kandidato di su partido Tet Kale ku a derota 26 rival den e promé ròndu e evitá ku nan lo a empatá. Vários kontrinkante no ta kontentu ku e resultado pero huesnan elektoral a konkluí ku no tabatin froude na gran eskala segun e konseho. E simpatisantenan di e kandidato Maryse Narcisse di e partido Fanmi Lavalas a kima tayo i marcha den protesta kontra e desishon di e tribunal elektoral. Despues di un algun ora tabatin hopi partidario di Moise selebrando den kayanan. Outoridatnan a anulá e elekshon na kuminsamentu di òktober 2015 kaminda Moise a gana. Moise ta asumí presidensia dia 7 febrüari.
