ATLANTA, AP.- Un hobensita di 15 aña ku a purba suisidiá na Georgia a wòrdu reskatá pa polis ku a mira e video bibu via Facebook Live.
E kaso ta parse di respaldá e argumento di e direktor general di Facebook Mark Zuckerberg ku tipo di kontenidonan asina por wòrdu mira pa amigu i famia, kende por yega na tempu pa reskatá e persona.
E mucha muhé a guli algun píldora i a kubri su kabes ku un saku di plèstik riba 2 di mei, den un intento pa kometé suisidio sofokando su mes, segun informashon di polis di kondado Bibb. Un agente a hañ’e inkonsiente pero na bida i ta kere ku e lo rekuperá.
Den aprel, Facebook a wòrdu alertá tokante un otro suisidio andando i e empresa a tuma e desishon pa laga e transmishon sigui, segun deklarashon di Zuckerberg durante un konferensia djárason. E desishon aki a permití polis pa “usa e transmishon bibu pa komuniká ku e persona i salba su bida. “Pues loke nos ta purbando di hasi no ta simplemente retirá e kontenido, pero duna yudansa na momentu ku un persona mester di esaki”.
